Andai-andaiku

Andai andai : Sang Penidur.

Ini andai andai asli njak di paiker. 

Pada zaman dahulu hiduplah seorang bujang tue Sang Penidur. Ngape dikatekah sang penidur karne gawenye ndak tiduk tula. Sang penidur tinggal di ghuma agak jauh sakdi dusun. Ghuma sederhane atap sirap dinding pelupoh. Dibelakang guma he ade bemban seghumpun. Bemban tu sejenis buloh tapi ghuase panjang biasenye kah ndek anyaman buat bakul, guntung, dll. 

Alkisah sang penidur ni biaselah gawehe tiduk tula, aghi la nyantak mateaghi lah tinggi maseh belum bangun. Tibe-tibe Ade suaghe sakdi belakang ghumahe : 

Dur Dur Dur sang penidur Dur, Dur bangunlah kudai Dur Dur aghilah siang Dur.

Lah 3, 4 kalinye suaghe itu baru tebangun sang penidur, sambil ngusok- ngusok mate, die jawab : dalam hatinye betanye sapelah banguni aku, suaghe sapelah tadi, tedengagh agi suaghe tadi : Dur Dur Dur sang penidur Dur Dur bangunlah kudai Dur Dur aghilah siang Dur. 

Dicakaghinye ngi sang penidur tadi sumber suaghe tu engkase ghumpun bemban tadi nye banguni Nye. Dijawablah ngi sang penidur, ngape bangunkah aku ni bemban ? Dijawablah ngi ghumpun bemban tadi : tebanglah aku ni Kate bemban tadi, diambik e ngi sang penidur pisau langsung di tebange bemban due batang lah ditetak i nye udim tu tepek kanye di belakang ghumahe tula, udim kate sang penidur bemban lah kutebang aku ndak tiduk agi. Ngulang tiduk agi sang penidur tadi. Belum lame die tiduk lah tedengagh agi suaghe bemban tadi bangunkah sang Penidur. Tebangun agi sang penidur sambil bekicek ade ape agi bemban ? Tetak i lah aku ni buatlah aku ni anyaman kate bemban tadi, Dide tanye agi ditetaki nye ngi sang penidur bemban tadi udim tu di gendame batan anyaman tadi di ayek lembak gumahe. Udim au aku ndak tiduk agi Kate sang penidur ngi bemban tadi. Sang penidur lah tiduk, tedengagh agi suaghe bemban bangun kah : Dur Dur Dur sang penidur Dur Dur bangunlah kudai Dur Dur sang penidur Dur. Tebangun lah sang penidur langsung ke belakang ghumahe ngambik bemban nye di gendam di ayek tadi, ngape agi bemban Kate sang penidur, dijawab ngi bemban anyam lah aku ni, dide siwe tanye agi langsung keghumah udim tu dianyamelah bemban tadi jadi lah bakul besak.

Udim nah aku anyam Kate sang penidur lah jadi bakul bemban tadi, aku ndak tiduk kudai au. 

Sementare sang penidur tiduk bakul tadi bejalan kebetulan di dusun dang Ade jeme sedekah melilek kebau besak tuape ndak ngagukkah anak jeme kaye. Pegilah bakul sang penidur tadi ke badah jeme dang masak i kebau. Kate jeme dang bemasak tu ai tuapelah ne ndek takuk gulai ni sambil becakagh nah ini ade bakul besak alap pule. Langsung dimasukkah ke dalam bakul tadi gulai daging lah masak, sisip dikit bejalan bakul sang penidur tadi balek ke ghuma sang penidur, sampai di ghuma dibanguni nyelah sang penidur tadi maseh ngeghoh : 

Dur Dur Dur sang penidur Dur Dur bangunlah kudai Dur Dur bangunlah kudai. Tebangun lah sang penidur tadi nginak bakul mbatak i daging penuh sebakul, langsung nanak sang penidur udim tu bekecikis makan singinye lah tepeluh. Masih belum abis. Ndek pagi Bae Kate sang penidur. Aku ndak tiduk agi Kate sang penidur. Langsung ngeghoh. Sementare sang penidur tiduk, bakul sang penidur bejalan agi ke dusun keban jati pas jeme kalangan Kemis pule, pegilah sang penidur tadi ke warung parti, tuape parti dang sibuk melayani jeme ndak beli suto, Ade jeme mesan 2 bungkus, 3 bungkus pukuk e banyak pesanan jeme tu, tuape Kate parti ndek takuk suto ni nah ini ade bakul besak ditepek Kanye lah ngi parti suto pesanan jeme di bakul tadi. Tuape parti dang rami lengah dikit langsung pegi bakul tadi balek ke gumah sang penidur. Sampai di gumah dibanguninyelah sang penidur ngi bakul : Dur Dur Dur sang penidur Dur Dur bangunlah kudai Dur Dur bangunlah kudai. Tebangun lah sang penidur dihadapan nye bakul Matak suto parti 10 bungkus langsung sang penidur makan suto lah abis 2 mangkuk, pukuk e lah kenyang sekenyange sang Penidur makan suto. Dem kalu lok itu aku ndak tiduk agi Kate sang penidur ngi bakul. Dide nunggu lame lah ngeghoh sang penidur lah tiduk.

Habis andai andaiku.

Sekian dan terima kasih. 🙏🙏🙏😊😊😊

Andai andai dari Paiker.

Judul. : Pak Rakup

Alkisah pada jaman dahulu, di daerah paiker kebiasaan kalu ngebun buka gimbe, biasenye berkelompok buka kebun untuk berkebun kopi buat dangau disuatu tempat bersame same terbentuk lah sebuah Talang. Talang ini biasenye dienjuk name, contoh talang Ayek angat, talang riban, dll. 

Nah ade keluarge nye ngebun buat dangau muncu sebuah dangau, keluarge itu namenye pak Rakup, anaknye Rakup dan bininye endung Rakup. Anaknye baru berumur 5 tahun. Di kebunnye lah ditanam kawe, sayur mayur dll. Untuk memenuhi kebutuhan setiap hari keluarge pak Rakup jualan sayuran di kalangan dusun yg perlu waktu 2 jam untuk ke kalangan.

Pada suatu hari pak Rakup demam, dikire demam biase tp ini dek gadu gadu lah seminggu masih tekapar ditempat tiduk, dindak agi makan lah sakit parah nian. Endung Rakup berusaha nyakagh ubat demi kesembuhan pak Rakup, tp belum kina gadu lah hampir 2 Minggu, waktu malam itu pecae pak Rakup lah sekarat, bekumpullah endung Rakup ngi Rakup disamping pak Rakup. Kate pak Rakup mungkin aku dek kah lame agi, kalu aku laju pantaulah jeme talang damping ngi kite minta tolong, jangan lok itu pak lok mane kami ndak idup kalu dekbedie kamu kate endung Rakup, Rakup tuape masih gi Kecik dek keruan ngape bapange tu. Akhire pak Rakup menghembuskan nafas terakhir diiringi dgn tangisan endung Rakup. Nak Kate endung Rakup ngi Rakup, bapang denga lah ninggal kah kemane kite nak ? 

Tibe tibe jenasah pak Rakup td pacak bebuni ngikuti buni endung Rakup : nak bapang dengan lah ninggal kah kemane kite.Tekejutlah endung Rakup ngi Rakup nginak pak Rakup pacak bebuni awak lah mati.Udim Rakup kite tinggalkah bae bapang denga ni kite ke talang jeme untuk minta pertolongan.

Di guyunye agi ngi jenasah pak Rakup kate an endung Rakup td.Sambil ketakutan endung Rakup ngambik tali dikebate lah jenasah pak Rakup tadi, udim nak kite pegi Bae....sambil melumpat njak di dangau bedue ngi Rakup belaghi lok kah terbang saking cepate, tuape aghi tu lah malam lah akap. Cuma ade sinar bulan bae, dikinai nye di dangau asekah rubuh dangau engkase jenasah pak Rakup berusaha lepas njak di kibatan endung Rakup, telepas lah jenasah pak Rakup langsung njagali endung Rakup ngi Rakup tekinak ngi lesung sambil njagal endung Rakup ngi Rakup sambil gerulak geralikkah lesung ade anjing dijagale, ade keduroh dijagale pule. Tambah takut endung Rakup ngi Rakup tambah nempicit belaghi lah dek tahan agi, Sesayup tedengagh suaghe pak Rakup di kejauhan endung Rakup, Rakup jangan tinggal kah bak nak.Tedengagh suaghe itu endung Rakup ngi Rakup tambah belaghi lok kurangan tanah.

Akhire sampailah endung ngi Rakup ke talang jeme, sampai di talang jeme lah bekumpul Karne nengagh suaghe minta tolong endung Rakup. Ade nye ngambik ayek minum ajunglah minum kudai enduk Rakup tu, ade nye nyilap lampu strongking. Udim tu 

ditanyei jeme endung Rakup : ngape sangkah lok ini, dicerite kanyelah ngi endung Rakup bahwa pak Rakup lah ninggal tp jenasah nye njagali kami. Udim becerite pingsan endung Rakup mungkin Karne terlalu payah ngi ketakutan. Lah sadar njak di pingsan ditanyei jeme endung Rakup dimane bada kebun ? Di daghat di sebelah ngi kebun jeme lah merepoh kate endung Rakup. Udim kalu lok itu pagi bae kite nyakaghi jenasah pak Rakup tu, aghi ni lah tengah malam kalu tejadi ape ape ngi kami kalu dicakaghi malam malam ni. Tiduklah pagi kite sesame nyakaghi nye. 

Pepagian panjang lah bekumpul jeme ndak nyakaghi jenasah pak Rakup. Udim kalu lok itu kite berangkat. Lah lame bejalan dikinai ade ghumput kebun jeme merepoh lah rebah kejimpa pecak ade jeme serombongan bejalan lah teabal. Akhire jeme telusuri jalan itu akhire tekinak li jeme jenasah pak Rakup tebulek di pucuk CUGUNG JEGHANGAU. Ngape sangkah dikatekah cugung jeghangau Karne bukit itu banyak tanaman jeghangau. Rupenye setan ndek merasuki jenasah pak Rakup takut ngi jeghangau makenye setannye keluagh njakdi jenasah pak Rakup.Akhire dibataklah jenasah pak Rakup ke talang sampai di talang nangis lah endung Rakup nginak jenasah lakinye. Udimtu dibatak ke dusun untuk di kebumikan.

Pelajaran bagi kite mbak ini :

Jangan be ume muncu sebuah dangau.

Tanaman jeghangau iluk untuk ngusir setan. 

Makenye jeme badah kite mbak ini banyak nanam tanaman jeghangau depan dangau, dibuat pule kalung dan gelang untuk anak anak mangke dide diganggu setan, Wallahu alam.

Kejadian ini Kate Ninik dulu kisah nyate. 

Sekian dan terima kasih. 🙏🙏🙏😊😊😊